كيفية انشاء CV او سيرة ذاتية

في هذا الموضوع رح نتطرق الى طريقة انشاء CV. اول خطوة نسويهة قبل لا نبدي ندور على شغل هية انشاء سيرة ذاتية قوية تنطي فكرة مبسطة عن خبراتنة ومهاراتنة.

طبعا انشاء سيرة ذاتية ممكن تكون خطوة كلش مزعجة لهواية ناس خاصتا لل انكليزي مالتهم مو قوي او لل ماعدهم خبرة قوية بمهارات ال حاسبة.

وهسة اجي وياكم شون تسوون سيفي او سيرة ذاتية محترفة :

١- اول شي الواحد يسوي ل انشاء السيرة الذاتية هوة انشاء قالب من الصفر او البحث عن قالب ( template ) بالانترنيت حلو ومبسط حتة نحط المعلومات ( اكيد كلنة حنسوي هل خطوة لان كلنة اعجوزية) .

طبعا اكو هواية قوالب حلوة ومجانية بالانترنيت واحسن طريقة نسويهة للبحث عنهم هية عن طريق بحث الكوكل ( google it )

تروح على كوكل وتكتب
-free cv doc templates
او
-free cv word templates

اكو هواية جمل اخرى ممكن الواحد يستعملهة غير هذولة بس احاول ابسط الموضوع ابسط مايمكن.

اكو موقع كلش كلش قوي للقوالب ولهواية اشياء اخرى للتصاميم :
https://www.canva.com/resumes/templates/minimalist/

هذا رابط الموقع مع قوالب سيفيات كلش بسيطة ومحترفة مو هوسة

** هذا الموقع ممكن ميوفر نسخة Word ف اكو طريقة حلوة نسويهة انو نحمل ال PDF وبعدين نحولهة لل word

الطريقة النحول بيهة ملف ال PDF لل Word حتكون كلش سهلة لان الفايل بسيط ومابي هواية اشياء معقدة للتحويل.

اكو موقع https://smallpdf.com مال تحويل ومجاني بس تختار
“PDF to Word”
وتحط الفايل وكلشي لوز يصير ( اكو مرات تصير مشاكل بسيطة للتحويل حاولو تجيكون المعلومات كلهة وتعدلوهة اذا لكيتو غلط )

٢- ثاني خطوة نسويها هوة ملىء القالب ونحط المعلومات والمهارات مالتنة والصورة اذا مطلوب وكل الاشياء الاخرى

( بالنسبة لل صورة الشخصية , هواية ناس محتارين بهل موضوع ف احسن شي تسوي هوة تحط صورة اذا مقدم على شغل يهتم للشكل مثل ممثل مبيعات او استقبال او واجهة ….. اذا الشغل الدتقدم عليهة ميهمهم الشكل بقة الموضوع يمك تحط الصورة او لا.)

٣- ثالث خطوة وال هية اهم خطوة هية شون نحط المعلومات

طبعا اكثرية القوالب حتكون مرتبة كلشي وانت بس يبقالك شون تحط المعلومات

حاول دائما تكون صريح بالمعلومات ,

هسة نجي لل ميعرفون شون يكتبون المعلومات او المهارات مال العمل

طبعا الموضوع سهل مو صعب حتة للمايعرف انكليزي

بالنسبة لل معلومات المبسطة عنك او اي اسم ثاني عادتا يكون اول قسم يشرح انت منو وينطي ملخص عنك ( Summary)او (Objective )

لل مايعرف شون يكتبهة : اول شي نسوي نروح ل صديقنة كوكل ونبحث عن

الاسم الوظيفي مالتك و وراها تكتب Summary

مثلا : sales representative summary for resume

وراها نبحث عن شي يرهملنة ونعدل عليه شوية ونحطة.

ثاني قسم هوة قسم الشهادات الجامعية والمدارس

بهاي الخانة تكتب اسم الجامعة و وياها القسم مالتك ونوع الشهادة

عادتا تكون نفس مامكتوب بالشهادة مالتك الاخذتهة من اخر مكان انت دارس بي

ثالث خطوة هية خانة ال عمل والخبرة

هنا هم نسوي نفس الطريقة ونروح لكوكل , بهاي الحالة نكتب الاسم الوظيفي و وراها نكتب duties

مثلا : خلي نكول اني اخر شغل الي جان Technical Support Specialist ف بهاي الحالة اروح على الكوكل واكتب
” Technical Support Specialist duties”
وراها راح يطلعلي هواية تاسكات عن هذا الشغل ف اخذو المعلومات التناسبكم وحطوهة بالسيفي او عدلو عليهة بعد ما اخذتوا فكرة عن المهام مال هذا الشغل

اخر خانة مهمة ال هية ال Skills

ميحتاج هم اكلكم شنسوي!!

نروح لكوكل حبيبنة ونبحث عن ال cv skills examples او اي شي مقارب. وراها نختار ال مهارات التناسبنة ونحطهة او نعدل عليهة ونحطهة

٤- بعد ما رتبتوا كلشي وحطيتو المهارات مالتكم نراجع كلشي ونشوف خاف اذا اكو اغلاط او صفحات زايدة

٥- اخر خطوة نحفظ الملف ب صيغة PDF و نحطة باسمنة مثلا

” Hakeem Alkhateeb – CV ”

ــــــــــــــــ

طبعا الترتيب مال اقسام يختلف من سيفي ل اخر

و اعتذر اذا اي شي مو واضح عادتا اكتب بالانكليزي بس هذا الموضوع لازم يكون بالعربي حتة هواية عالم تفتهم.

الموفقية للجميع وان شاء الله اكون فدتكم ب شي.