مصادر لتوسيع افكارك بخصوص التسويق وتطوير مشروعك ك فري لانسر او شاب يستخدم انترنت .

صفحة الكاتب رامي

اليوم رح أحجيلكم عن سر من اسرار البحار السبعة اني منين اجيب الTricks وهالسوالف اللي تشوفوها مفيدة لمشاريعكم وشغلكم.. لكن قبلها خلي نوضح شغلة ونعترف بيها. أني بالحياة لما اعوف شغلي واجي اكتب خريط افيد بيه الناس هدفي الاساسي يكون افادة اي شخص Freelancer مثلي لان وحسب وجهة نظري أشوف ان صاحب المشروع الصغير او الفري لانسر  هو أكبر بزنز مان/ويمن مظلوم بالتاريخ البزنزي كله. ليش ؟. أسباب كلش كلش هواية اي واحد مسافر برة وشايف تسهيلات رح يعرف شقصد لكن اهمها ان دولتنا المحترمة ضمن دول الفلاسفة الفرنسيين بالخمسينات جانوا ديردون يعبرون عن اهانتنا وكَالوا ( دول العالم الثالث ) نعم ببساطة لان احنا دول العالم الثالث حكومات غير متحظرة شعوب متفرقة اضافة لسبب اخر خصامات سياسية عالمية اهمها العراق محظور تحت 7 قوائم تظم الارهاب تصعب التعامل المالي مع العراق. لذلك وبعد تجارب كثيرة لما اني اسوي مشروع ناجح بهالدول (بدون واسطات او اذية احد) واعبر كل المصاعب اعتبره أنجاز مو انجاز بل شي نستحق ولله العظيم نفخر بيه تخيل انت تقني تبدي مشروعك بمجهودك وامكانياتك فقط دون دعم من احد وشخص مثلك الفرق عنك فقط فقطططططططططط لان انولد بدولة ثانية ويحمل جواز ثاني محترم ومرموق ويستحق دعم بنظر العالم اكثر منك هنا لازم تقدر لما كالو اهنونا بعبارة دول العالم الثالث لان فعلاً احنا دنعيش بعالم متدني وبعيد كل البعد عن التطور ودعم الشبب وبناء الامم..

‌أني منين اجيب الtricks ? بكل بساطة اني مثلي مثل اي IT عراقي معجب جداً بالتكنولوجيا الاجنبية والاجانب اللي نفس افكاري لذلك التقي بالاماكن اللي يلتقون بيها غصباً عني حتى اكسب خبرات منهم بشكل مباشر !! زين شلون يصير هالشي عالفيسبوك ؟ للاسف لا, اغلب الIT الاجانب ميحبون الفيسبوك مثلكم بل يحبون شي انتو متحبوا لان ماضيكم وياه مو حلو وهي #Forums المنتديات.. اني من اكول للناس انو اغلب المعلومات اجيبها هي مشاركة من مواضيع بالمنتديات يستهزؤون بالمعلومة لان كل ضنهم ان منتدى التقي بيه نفس المنتدى مال حبجيات العربي جان يلتقي بيه اول ما اجه انترنت للعراق. يعتقد العراقيين ان فكرة المنتديات انتهت وصارت مودة قديمة لكن بالحقيقية لا العربية منها فقط هي التعبانة لكن المنتديات مال اجانب والمقصود بالاجانب همه اي دولة ماعدى العرب جدا جدا مفيدة وبيها تبادل خبرات وبيها تنسيق وتنظيم يخليك تستغل وقتك بشكل صح وتبني معلومات..

‌كل اللي تحتاجة هي لغة المنتدى اللي انت فايتلة وغالباً هي الانجليزي دائما واذا ساءت بيك الاحوال اكو كوكل ترانسليت بالاضافة لهذا التواجد بالمنتديات يطلب شغلتين, اما تكون انت شخص متفاعل مقابل ان تحصل على معلومات لازم تشارك معلومات وتحصل مقابلها على فلوس ونقاط وهمية مثل Likes/coins/ranks/reps  (أو)  تكون شخص هاوي ومتابع بنظرهم وتفوت وياهم للمحتوى الPrivate مقابل تدفع فلوس وغالباً منتديات بيها شغلتين اما اشتراك شهري/سنوي أو لايفتايم تبرع وتصير من عيلتهم الخاصة.. (لكن) اكو مشكلة ثانية وهي العنصرية نعم احنا سمعتنا بكل دول العالم غالباً مو حلوة ابداً وممكن يكون الشقة جارح النا مع ذلك اكو حل وسطاني اني استخدمه وماعندي مانع اشاركه وياكم.. تعرفون دولتنا وخارجيتنا من ازبل الحكومات ف اذا انت هسه باميركا او دولة اجنبية وتكتب بالبحث IRAQ بكوكل يطلعلك ازبل الاخبار حروب على قتل على تهديدات القاعدة و دا‌ع‌ش‌ على مقتدى على العصائب ف اي اجنبي تكله انت من العراق ويبحث عن بلدك رح تلعب نفسه ك نظرة اولى والمثل يكَول ( لن يكون هناك فرصة ثانية ابداً لتغيير النظرة الاولى) لذلك شنو الحل البسيط لاكيه ؟ تكَللهم اني من وادي الرافدين او بالانكلش mesopotamia اول ميروح يبحث عن هذه البلد بالكوكل رح تطلعله اثارنا على تاريخنا على علمائنا اللي ماملطخه نتائج البحث بالارهاب والفساد لذلك النظرة الاولى رح تعبر بنجاح واذا جان مقابلك متطفل وكلك بس الميزوبوتيميا هي العراق حاليا ؟ تكَوله نعم ولا بنفس الوقت احنا الاقليات اللي تسكن شمال العراق ماتركنا ارضنا وضلينا بيها من اسلاف اسلافنا. هنا بعيداً عن جذبتك بس رح تتخلص من نظرة انك عايش بدول العالم الثالث وانك مظلوم الخ الخ الخ تكدر تجذب براحتك بعدها حسب شطارتك في سبيل تندمج وتتاقلم مع هالمنتديات وتكسب صداقات حلوة لخبرات متبادلة..فيسبوك تسجيل الدخول

‌رح تكَول زين سوال أكلك بابا ليش دوختنا بهالجريدة يعني ليش ما انت او غيرك ينقل النا المعلومات والمواضيع ينشروها ونستفيد بهالحالة ليش ندوخ نفسنا ؟.. رح اكلك هذه هو سبب فشلنا انوا دنعتمد على شخص اول مايكسب معلومة هي اصلا منقولة يجي يشمر بيها علينا ويعتبر نفسه فيلسوف زمانة.. ابسط مثال بوست سابق حجيت كم نقطة على فيسبوك كثير ناس فاتت تفتح وياي مشاريع وتسال اسئلة اكثر الها علاقة بخصوصياتها بصفحاتها وهالشي غلط هالشيء هو اللي خلق احمد الغالب واللي مثله للساحة العراقية انكم دتعتمدون على شخص ثاني بنقل المعلومة الكم والتكبر عليكم بينما هي كدامكم لو عرفتوا الطريق رح تصيرون احسن من الشخص اللي دتروحون لمساعدته. والاهم لازم تشوفون العالم ان العراق بيه ناس وشباب تدور عالمعلومة وتدور عالمواضيع هاي مال تكبير مشاريعكم وتسويق والاستثمار وغيرها الاف من المواضيع..

‌شكد تقضي وقت على فيسبوك نصف هالوقت خصصه للمنتديات التقنية الاجنبية واي موضوع يعجبك انقله للفيسبوك ك محتوى وناقشه ويه اصدقائك وناس تحبهم رح تكسب معلومات اكثر رح تحب الموضوع اكثر تخيل ناس مجتمعين بشي اسمه منتدى مهمتهم ان طول اليوم يشاركون مواضيع وبرامج وادوات وشروحات وكتب مفيدة كلش وحصرية والاهم جماعتك العرب ميعرفوهن ابدددا لان انت اول من ديقراها او ديتابعها.. الكل يحلم يصير هو الذكي والجيكر الوحيد بين اصدقائه او المجتمع الهو بيه او حتى مكان العمل لكن سبب فشلنا هو اننا مادنشارك المعلومة من صدك دنذبها مثل القطارة في سبيل نظل احنا احسن الموجودين بينما لو بدلنا فكرنا وسوينا مثل الاجانب ( شكَد ماتشارك اكثر شكَد ماتصير المنافسة اقوى وتطور اكثر) بوكتها من صدكَ رح نكَدر نبدع.. ولا تصدكَ ابدا ان هالكورسات وهالمعلومات تحصلها هنا وهناك هي كلها من قبل الكاتب او المحاظر دائما اكو Source رئيسي للمعلومات ولازم انت توصل دائما لهل سورس حتى تكدر تستفيد صدكَ من هالمعلومة واني كلت مسبقاً ان اسهل سورس هو المنتديات نفسها والناس اليلتقون بيها.

‌ مثال لمنتديات التسويق

رح اكلكم طريقة يستخدمها الاجانب الفري لانسرز الحدايق مثلي بتطوير مشاريعهم..

بالبداية بما انكم مجلبين برب فيسبوك والتمويل بيه ف لازم تعرف ان فيسبوك مو بس تحدد الAudience وتربط بطاقة دفع وتمول لا غلطان اكو امور كثيرة رح تعرفها مستقبلاً تختصر عليك دولارات كثيييييييرة جنت تستخدمها بدون خبرة ظناً منك انك لوتي لما ماجبت دجتال ماركيتر يطورلك شغلك واستغليت راتبه بالتمويل.

اضافة للتمويل والtricks مالته اكو ادوات تستخدم لتطوير الصفحات واول اداة يستخدمها كل بيج لكل وسائل التواصل الاجتماعي هي اداة Jarvee هذه البرنامج للحاسبة لكن يتم تنصيبه ب سيرفر يجتمعون مجموعة فري لانسرز لنفرض 5-6 مشاريع ويشترون سيرفر وينصبون بيه جارفي على سبيل مثال وبلسيرفر على نفس برنامج يفتحون 6 يوزرات بالويندوز كل واحد يستخدم برنامج من اجل الAutomation ببساطة هذه البرنامج لما تكمل اعداداته رح يزيدلك تفاعل البيج او الكروب او الحساب ب 40-60% والسبب تعرفه من تجرب برنامج وتبحث عليه وتشوف شروحاته..

هذه كان مثال للبرنامج اكو الاف برامج بنفس الطريقة يتم استفادة منها عن طريق مشاركة عن طريق #التعاون والمشكلة اني شفت بالعرب ماكو اي تعاون بيناتهم واذا صار تعاون بين اصدقاء فترة ويخرب للاسف. غير البرامج المشاركة تنجح بشراء العضويات من منتديات مثلا انت وصديقك مشترك عضوية بريميوم بمنتدى A وصديقك هم مشتري عضوية ومتبرع بمنتدى B انت شفت محتوى عجبك بالمنتدى مشترك بيه صديقك والعكس صحيح هنا تتبادلون حسابات العضويات او تنطي رابط تحميل لاي محتوى مقفول للزوار او تشترون ثنينكم شراكة بعضوية باحد منتديات وهنا رح تستفادون باقل كلفة من المعلومة لكن لذة المنتديات هي لما تطور نفسك وتبدي انت تشارك مواضيع وتحصل اعجاب الحواليك بافادتهم..

منتديات التسويق اللي انصحكم بيها كبداية:

منتدى عالم البلاك هات (صح شكل المنتدى خرا بس اعظم العظماء واقوى افكار التسويق والكتب والتخفيضات تلكاها بهلمنتدى العلاقات التكدر تبنيها بيها كارثية) هذه رابط والعضوية يمهم غالية ( blackhatworld .com )

منتدى SeoClerk بالسنوات الاخيرة تحول لمكان ربحي فقط لكن رح تستفيد بيه همين بقراءة المواضيع وشنو مركز السوق بالوقت الحالي على كتب الالكترونية للتسويق ( seoclerk .com )

منتدى وايرور فورم ( هذه ببساطة اكدر اكلك اذا كنت مبرمج ف هذه هو الStackoverflow بس مال اهل ماركيتنك والسيو) ههذه رابط (warriorforum .com)

منتديات ثانية مابيه حيل اوصفهن:

webhostingtalk .com

webmasterworld .com

الخلاصة:

بعيداً عن ان زوكربيرغ وتطبيقه المسيطر عليكم ديسرق وقتكم بهالحياة, لكن اذا تريد تبدع وتنجح بالبقعة اللي انت بيها ميصير تجي تاخذ معلومة من شخص بنفس البقعة انت بيها وتريد تتميز وتنجح لازم تكون مصادرك من دول ومجتمعات ثانية حتى تكون خطتك متميزة وتذكر دائما الشخص اللي نقلك المعلومة للعربي حتى لو كانت مفيدة او متميزة تذكر دائما انه نقل المعلومة حسب وجهة نظره هو وحسب الشي الحبه بالمعلومة وحب ينقله لذلك المصدر دائما يحتوي على تفاصيل اكثر من اللي انت عرفتها بالعربي سابقاً وللاسف بوقتها من يصير المجمتع العراقي اله اطلاع عالمنتديات الاجنبية من صدك ومكون صداقات بوكتها نفتح موضوع اثراء المحتوى العربي ونفيد الاجيال القادمة من البداية بدون ان ينذلون مثلنا.

رامي

بالتوفيق للجميع ودمتم سالمين.

كيف تبدي مشروع الكتروني بأقل #خسارة ممكنة

صفحة الكاتب رامي

‌أكيد كثير هنا واني اولكم من سنوات من شفت ان استضافة المواقع وكلفة الدومين ممكن تكلف 12$ بالسنة اجتي ببالنا أفكار #نعتقد انها مميزة وتنجح وتنافس عالمياً لكن بعدين انصدمنا بمشاكل وبمعوقات كثيرة أهمها مادية. المشكلة ان هالشي مستمر لحد الان. لما احد يفكر يسوي مشروع ويحتاج شيء الكتروني اله رح ينصدم ب طلب المبرمج او الشركة البرمجية بمبلغ خيالي من اجل انشاء تطبيق او موقع الكتروني لمشروعة بينما هو يشوف بالأنترنت فلان استضافة وفلان دومين (اسم نطاق موقع) أسعار بخسة جداً خصوصاً لما الشخص العادي يفوت على Envato.com ويشوف كمية المشاريع الجاهزة بأسعار قليلة جداً اقل بعشرات الرقم اللي طلبه المبرمج المحلي..

‌والجواب لهل شيء بسيط جداً لازم تعرف ان المبرمج اللي انت طالبه ينشأ الك تطبيق او مشروع برمجي هذه مرح يشتغل وحده بالاضافة رح يطول شهور يلة يسويلك مشروعك البرمجي (من البداية على أيده قابل للتطوير اكثر) والاهم حتى لو راد يلتف عليك او يلعب عليك مارح يكدر يجيب لك مشروع جاهز من Envato بسهولة لان كل كود برمجي على الانترنت اكو بيه ترخيص مجاني واكو بيه يحتوي على رخصة استخدام معين قابلة للمتابعة والمراقبة ما يكدر يجيب لك ياه من اجل مشروعك اللي تريد تنافس بيه عالمياً مستقبلاً او اللي بينكم عقد رسمي إضافة لذلك المبرمج ميكَدر يجيب مشروع جاهز هو ما دارسه او مشتغله على ايده وتطلب منه تطوير (يضيف عليه تحديثات وامور انت تطلبها مستقبلاً) لهذا السبب تشوف ان ان التطبيقات للأفكار والمشاريع الخاصة   ل ربح المال من الانترنت أسعارها بألاف الدولارات (اعرف اكو تطبيقات رخيصة لكن هذه اغلبها مشاريع مستنسخه ومباعه لأكثر من عميل يعني انت مجرد نسخة من بين الف نسخة وكثير منصات تبيع هالمشاريع المكررة والمابيها حقوق للمالك فقط مثل codecanyon.com).

‌هسه لهنا فهمنا ان المشروع اللي تريد تنافس بيه ويكبر ويدعم الملايين الجانب الالكتروني منه يطلب منك فلـــــــــــــــوس للمطورين رواتـــــب للموظفين وللمسوقين ولريسورسات المشروع مصاريــف أضافية قيامة يعني بالنهاية الواحد رح يوصل لقناعة ان البزنــز الناجح بهالوقــت هو اللي يبدي من الطموح البسيـــط لا اكثر… واليوم بهالمنشور رح نحچي عن معلومة مهمة لازم تعرفوها قبل بدء مشروعكم الخاص ك فريلانسرز حتى:-

ماهو الـWhite label والـWhite Paper بلانز بعالم البزنزجية ؟

ممكن الان او مستقبلاً او سابقاً بتجمعات الستارتابز والماركيتنك والبايمنت بروفايدرز تسمع كلمة White label Plan (WLP) او White Paper Product (WPP) بين البزنزچية شنو هذني الشغلتين بله ؟

‌الـWLP بكل تبسيط هو انت لما تسوي مشروعك برودكشن وتصرف عليه بلاوي فلوس حجيناها فوكَ وتنطلق بيه ويجون عليك مستثمرين صغار او معجبين بمشروعك وانت بنفس وقت ما تريد تبيعه الهم او تنطيهم سورس كود وبنفس وقت تريد فلوس تكَدر تقدم الخدمة اللي يسموها White Label الهم وهي ببساطة أنك تنطيهم API من سيرفر مالتك باك اند (الAPI هو فد تكنولوجي يربط الخدمة مالتك “مشروعك” بمشروع شخص جديد يريد يفوت للساحة بنفس خدمتك لكن باسمه) يكَدرون من خلاله يقدمون خدمة SaaS ( Software as a service ) لزبائنهم اي انهم رح ينطلقون بمشروع جديد منافس لمشروعك بالسوق (لكن بالحقيقية انت المالك الأصلي او المزود لهذه المشروع) ودائما الوايت ليبل للمستثمر سعرها يكون غالي نوعاً ما لان انت ك شاري للخدمة رح ينطيلك المزود السعر النهائي المضاف للربح مالته لكن الإيجابي بالموضوع انك صح رح تربح شي أقل من البدء من الصفر لكن بس تتفق على الوايت ليبل بلان وتضبطها رح تباشر خلال أسبوع واحد فقط كحد اقصى وتدخل بيه السوق وتقدم خدمتك للزبائن بدون تكاليف استضافة بدون موظفين بدون مصاريف على اي شي ثاني غير الترويج لمشروعك يعني ببساطة اكثر حالك حال التاجر من يجيب بضاعة عالتصريف لكن انت دتاجر ب خدمة الكترونية تقدمها للناس مشتريها بسعر وترجع تبيعها باسمك بسعر ثاني تقريباً مثل الDropshipping لكن سيرفس مو برودكت.

كيف تستفاد من White Lable?

انت لما تبدي مشروعك او شيء تفكر بيه مارح تكَدر تدخل للسوق وتنافس مباشرتاً تحت ضغط المنافسة خصوصاً ان كنت عراقي مامحصل على دعم الشركات الاجنبية اللي توصل ل 200 الف دولار مجاناً خصوصاً اذا جانت فكرة مشروعك مقلدة هنا يجي دور الوايت ليبل حتى تساعدك بتوفير فلوس المبرمجين/الريسورسات/عقود العمل/ومصاريف كثيرة إضافة للخبرة بجودة المنتج بالسوق اللي المزود مالتك مسبقاً حل كل مشاكلها ورح يحلك مشاكل مستقبلية ايضاً على حسابه. مباشرتاً بعد متأخذ الوايت ليبل وتدخل للسوق مالتك وتعرف ان مشروعك ناجح وديضخ فلوس الك انت تلقائياً رح تبدي بالتعامل الجدي مع هذه المشروع وتبدي تبني مراحل انشاء الكود او البرودكت الخاص بيك والاهم رح يجيك واهس وثقة بنفسك ان مشروعك نجح ومحتاج هسه دعم مادي فقط وهنا حتى اذا تريد مستثمرين رح تكون الك الأفضلية لان رح يشوفون اكو برودكت منطلق بالسوك لكن بالحقيقة انت كل شيء ما مسوي من يمك لحد الان كله جاهز ف تجيب مستثمر و تبني فريقك الكامل وبوكتها من تجي تبحث عن فريق برمجي مارح تفكر بالسعر لان فلوس اكو وثقة اكو بمنتجك رح يكون احتياجك للجودة فقط ومن يكَلولك احنا ناخذ كذا الف دولار مارح تنصدم لأنك تعرف مسبقاً الأرباح شنو رح تكون إضافة لثقة المستثمر اللي رح يشوف مثال حي ان مشروعك ماشي بالسوق لكن “محد يدري غيركم انتو ان هذه المشروع بالوقت الحالي مو تحت تصرفك الكامل قانونياً وانما انت وسيط ديقدم سيرفس باسمه لا اكثر”.

‌مثلاً خلي انطيك مثال قبل فترة صارت خطة كَدامي بأحد المنتديات احد المبرمجين عجبه يفتح مشروع customizable online storefront كـSaaS مثل فكرة مشروع موقع Shopify او Wix شسوة برائيكم ؟ اول شي راح سوة دراسة بالسوق عن افضل شركة صغيرة بعدها ماطاكه وتوفر White label راسل اهل المشروع عن طريق احد المنتديات وانتهى الاتفاق بتوفير الخدمة والاسعار چانت المزود يقدم الخدمة مقابل لكل 1 يوزر شهرياً 9$ شاملة كلشيء دعم كامل بس يجيب دزاينر للفرونت اند يسويلة دزاين جديد واربط ابلكيشنات المتاجر على دومينك وابدي بيع وانطلق للسوك المحلي مالتك اني تابعته لانه جان دينشر عن مشروعه بالدردشة Shoutbox مال احد منتديات هو أتأخر الولد حوالي شهر وانطلق بدزاين مختلف بعد مشوفنا ياه ماتكَدر تعرف بسهولة ابداً انه هذه السيرفس من فلان موقع وبده يبيع الخدمة ب24.99$ ( عليه ب 9 ويبيع ب25) هو انطلق بشهر ال4 هالسنة قبل شهرين تقريباً صار عنده حسب كلامه بحدود 8000 Seller أكتف فاتحين متاجر ومواقع بمشروعه يعني دخل شهري بقيمة ( 24.99 × 8000 = 199,920$ ) ببداية السنة الجديدة رح يبدي مباشرتاً بتطوير البرودكت الخاص مالته من الصفر ببرمجتهم وراها يفسخ عقده عن المزود الحالي ويستمر ك مشروع خاص بيه بعد ان نجح وجاب زبائن ومردود شهري ماشي + فلوس تمويل من نفس مشروع بدون مستثمر.

‌يعني رح نفهم من هالتجربة سبب النجاح الحالي حلمه او طموحة چان مجرد شيء بسيط يجيب منه دخل بعد ان شاف الفلوس وشاف مشروعه شون ديكبر كدامه قرر يبدي من الصفر ويصرف عليه اكثر ويبدي من الصفر صح لكن مع ثقة تامة بان مشروعه رح ينجح ويجيب مردود مادي مستمر من الشهر الاول ( عكس ما يتم بالعراق اول ما يفكر شخص يبدي مشروع ما عنده اي استهداف او نظرة لمستقبل مشروعه ويكتفي بكلمة لله كريم وبنفس الوقت يريد ينافس عالمياً لهذا السبب المشاريع العراقية تعبانة ومأ ممكن تتوسع للخارج بسبب مشاكل كثيرة مابيه حيل احجيها)

ما هو الWPP  

‌ولو ميفيدكم بلبداية بس هسه نجي على الWPP شنو ؟ هو نفس الخريط الفوكَ لكن الفرق هو انك تبيع نسخة من المشروع مالتك كنسخة نهائية مملوكة لمشروع واحد بمنطقة معينة. يعني على سبيل المثال انت شركة فيتنامية البزنز مالتك مستهدف فيتنام فقط ما عندك طموح مستقبلي انك تستهدف خارج فيتنام وبنفس وقت انت صارف هم بلاوي فلوس على مشروعك فـ اجي اني العراقي اشتري منك المشروع وتسويلي Clone “نسخة من مشروعك” وتنطيني ياه ابدي بيه شركة “من الصفر عساس” بالسوق مالتي #مقابل عقد بيه هواي تفاصيل الشرط الوحيد المايتغير دائماً هو المنطقة/السوق المستهدف بالمشروع يكون محدد

يعني اني اشتري WPP من شخص فيتنامي او صيني مقابل افتح مشروع للعراق فقط مقدم يكون بكلفة اقل من انشاء واحد من الصفر وهالنوع من بلانات مينجح الا بالقارات المختلفة والاستهداف المختلف وكل مايكبر مشروعك رح تكبر مشاكلك بهالعقد الى ان تصل اما تشتري شركة المزود الاول للكود او تبيعها اله ك فرع بهلبلد. واكو قصص كثيرة عن شركات بدت من WPP/WLP الى ان سيطرة عالسوق لدرجة اشترت الشركة الام اللي برمجة المشروع بالأساس.

وايضاً بالنهاية لجماعة WPP الاثنين رح يكونون رابحين الاول حصل تمويل لمشروعه وخسر توسعه ببلد هو اصلاً ما مفكر بيوم من الايام يستهدفه ولو بعد حين. والثاني اختصر على نفسه فلوس كلش كلش هواية وانطلق بالسوكَ بفترة قصيرة + بدون ميتعب بإيجاد تطوير المشروع من الصفر وحمايته ودراسة طلب السوق دون معرفة هل رح ينجح او لا.

‌وتذكر ان الفرق بين الWPP و WLP ان وحدة منهن دفع شهري او عالتصريف والثانية one time payment لكن الاثنين يحكمهن عقود وبنود خاصة مثل الاستهداف الجغرافي او حدود التوسع.

‌ودائما تذكر اذا ناوي تسوي مشروع عراقي فكرته مكرره بغير بلد ف لا تفكر ابداً انك تبدي من الصفر خصوصاً بالسكيورتي التعبان اللي احنا بيه وانت ماتعرف هل رح ينجح مشروعك او لا, نصيحتي هي مباشرتاً ابحث عن الWPP/WLP لدولة ثانية بعيدة عنك ونيشن عالمشروع اللي تشوفة مرتب وراسل من أجل طرح فكرة العمل هذه.

شون تلكَاهم هذولة ؟ من خلال تجمعات الستارتابز من خلال المنتديات من خلال الكَروبات الخاصة بالبرودكت مالتهم بالنهاية اللي يطلق الWLP يكون محتاج الى فلوس تكبر مشروعه وتوسعه اكثر لذلك اول من ينشرون هالشي تلكَاه كَدام المعجبين بمشروعهم اللي أصلاً تعنوا وبحثوا عن كَروب فيسبوك وانضموا اله وهكذا.. دائما حاول تنيشن على المشاريع الناجحة الصغيرة اللي تتوقع انت همه تعبانين على مشروعهم ورح تلكَه ان مشاريع الصغيرة فرصة التعامل وياهم والاتفاق اسهل من الشركات الجبيرة اللي متحتاج لهلطريقة بالحصول على تمويل لمشروعهم.

‌للتاكد من كلام قبل شهر شركة صغيرة سووها 2 فري لانسرز المبرمج فرنسي والمسوق بريطاني والموظفين هنود اسمها سلفر بوت بكَروب الشركة مالتهم اللي تقدم خدمات بوتات المسنجر وواتساب (وانستاغرام مستقبلاً) اطلقوا نية بيع الWLP بس ماعلنوا عنها للعلن فقط علكروب لمتابعيهم هذه سكرين بوست ( https://scr.3rb.ee/qp7.jpg ) وكانت خطتهم يبيعون ل 100 اشخاص كبداية بسعر 9$ لليوزر من طرفهم او هيج شي لان جانوا محتاجين فلوس بشكل سريع لتطوير مشروعهم اكثر وفعلاً باعوا العشر لايسنات بشكل سريع من قبل الفانز متابعيهم وصار بالسوق اكو عشر براندات منافسة بالسوق لكن وراء الكواليس هي بالاصل مملوكة ك باك اند للشركة المزودة اللي هي سلفربوت يعني همه ببساطة سو فكرة ( اذا لم يكن لديك منافس فاصنعه بنفسك) وبنفس الوقت العشر براندات انطلقت بدول مختلفة تستهدف سوق معين محلي وبنفس الوكت يجيب ربح لل100 اطراف والمستفيد الدائم اكيد هو المزود الاول للخدمة بالخلفية اللي هو اللي باع السيرفس الهم.

‌رح انطيكم مثال لشركة لخ بالبلاك فرايدي على موقع Apssumo اكو شركة براندها هسه منطلق بالسوك اسمها Nimbus هذه تقدم ( خدمة ستورج صور سكرينات و نوت و ocr اونلاين واوفلاين تقريباً مثل نوشن بالضبط لكن أشياء اكثر بيه)  كَالوا يابه عدنا عرض نريد نبيع الWLP  ب ١٧٧$ وكاتبين ان الوايت ليبل مالتهم حتى بالدفلوبمنت يعني من يجي أحد ثاني يقره الكود مال موقع مالتك من رح تطلقه مرح يكَدر يعرف ابداً انه تابع ل  nimbus. وللتاكد اكثر مواصفات اللي جانو عارضيها للWLP بالسكرين هذه ( https://scr.3rb.ee/XEh.jpg ).

هسه اذا اكو مبرمج ف رح يكَول شنو هالغباء ؟ اني اشتغلت وكبرت مشروعي ليش دا أجي ابيع ال WLP واخلق منافس لنفسي ؟ ف الجواب اخي الكريم اذا انت مبرمج ناجح وكودك مرتب مو بالضرورة رح ينجح مشروعك ممكن تكون انت المدير او المسوق الغير مناسب لهذه المشروع والتوسع يحتاج وقت وجهد وانت ماعندك ياه لذلك يلجاء اغلب المبرمجين الى هذه البزنز لتكبير مشاريعهم وزيادة انتاجهم فكرة الWLP هي مشابهة لبيع البضاعة بالجملة لعميل مستمر ربحك رح يكون بالكمية وتوفير السيولة بشكل سريع لتطويرك وتكبير نفوذك.

‌اما اذا انت جنت شخص بزنزجي يريد يسوي مشروع وينجح ف انت الرابح الأكبر هنا لأنك رح تمارس غريزة الإدارة اللي تحلم بيها من زمان بدون ان يكون عندك معوقات مصاريف المبرمجين العالية او الموظفين بداية مشوارك ورح تركز على شغلتين فقط هي الWLP /WPP المناسب الك واللي ميقيدك ببنود تمنعك من التوسع مستقبلاً و رح تستعد لتكريس جهدك لتسويق مشروعك وتوفير الشي اللي رح يميزك حتى عن البراند الرئيسي اللي ديزودك وهي #وسائل_الدفع_المحلية.. نعم ابو المشروع العالمي مرح يجي باله او يفكر يدعم زين كاش واسياسيل ودفع بالرصيد ومعرف شنو من وسائل عراقية محلية هنا انت دورك حتى تحتكر هالشغلة وبهالحالة بتوفيرك لدعم الوسائل المحلية والسهلة للزبون المحلي رح تسيطر على رواد السيرفس الدتبيعها وتبني سمعة براندك الخاص بمواصفات مشروع عالمي الى ان يصير براندك طاكَ وبوكتها اني أتوقع رح يكون الك طريقين اما تبيع براندك كله لشركة اكبر منك وتبدي مشروع ثاني من الصفر براس المال طلعته مقابل مبلغ زهيد أو تسوي مثل الولد اللي فوكَ تصرف ارباحك على مشروعك نفسه وتحوله لبراند من الصفر بتمويلك الخاص اللي جبته من نفس المشروع عن طريق الWLP/WPP بعد ان فسخت العقد.

‌وبأسواء الأحوال اذا فشل مشروعك ف أنت هنا افضل السيئين فشل مشروعك دون ان تنكسر بكم كبير من المصاريف مال تطوير تطبيق او مشروع برمجي او البراند بكل بساطة رح تكتشف اخطائك وتمتلك الخبرة اللي مجنت رح توصللها بهلسهولة بدون ال WLP. لأنك بلنهاية مثل مكَلنا بكل بساطة عبارة عن تاجر جاب بضاعة وشوفها للسوك على انه هو اللي اشتغلها من الصفر لكن الباك اند محد يعرف بيه غير انت والمزود والمستثمر المستقبلي.

اقرا ايضا: بعيدا عن الناحية العلمية ومناهج TOEFL / IELTS الاكاديمية سانصحك بطرق مسلية لتعلم الانجليزية بسهولة مع الوقت.

‌ودمتم سالمين.

رامي