مقارنة بين راوتر TP-Link وراوتير Xao Mi

قبل فترة احتاجيت لراوتر جديد ومثل ماتعرفون السوك بي هواي انواع وهواي اسعار وطبعا ابو ال30 مو مثل ابو ال150 لحد ماشفت كدامي راوتر جديد وورة بحث عنه بالنت وشغله والتجارب اخذته طبعا الراواتر الي جان عندي هو tp link router tl-wr940n 450mbps (موجودة صورته واعرف قديم) الراوتر الجديد هو mi router a4 giga version من شركة شاومي … شنو الي تغير عندي اول شي النت راح تشوفوه بالصورة رقم (1) هو الي جان يوصلني من ال(TP Link) بالصورة رقم (2) هو النت الي وصلني من راوتر شاومي رغم انه اني بنفس المكان كاعد والراوترات بدلت واحد بدل الثاني (مسافة مو بعيدة عن الراوتر تقريبا 10 امتار وبوجود نص حاجز لان الباب مفتوح والراوتر شبه كبالي )
الصورة رقم (3) هو النت الي وصلني واني بنفس الغرفة الي بيها الراوتر
النت عندي الداونلود هو 100 ميكا بت بال(TP Link) الي جان ضايع تقريبا 65% في حين وية الشاومي الضايع 22% بس (الابلود 15 ميكا بت فا ماضايع شي تقريبا)
استقرار البنك بالالعاب (ماعندي بلي ستيشن فا جربت عالببجي هاي كدامكم البنك شكد في حين وية ال(TP Link) جانت اقل شي توصله 88 ) واثناء اللعب البنك جان كلش مستقر ( ماعبر ال80)
التغطية بالنسبة للجهازين متقاربة مع فرق بسيط للشاومي على ال(2.4) بس ال(5G) اضعف
المميز الاكثر بالجهاز هو رخص ثمنه مقارنة بقوته سعره مايتجاوز ال35 الف دينار وبالوكالة يجوز جوة ال30 الف
تنصيبه جدا سهل للمرة الاولى حتى لا اتدوخ مجرد تكنك عليه وتفتح من الويب موقعه وتدخل عالراوتر (لازم تكون مسوي حساب بموقع شاومي مسبقا ) تغير الاسم وتحط باسوورد (الجهاز اول تشغيل بدون باسوورد) وراها تنزل برنامج Mi wifi بتلفونك وتبدي تغير بالاعدادات بكيفك
الجهاز يتحمل هواي اجهزة متصلة بي (تكدر تعرف من التطبيق منو مكنك وشنو الجهاز واسم الجهاز ونوعه ) وتتحكم بالنت الواصل لكل جهاز وشكد ديستهلك نت
العيوب : تغطية ال(5G) مو واسعة … الانتينات ثابتة غير قابلة للتغيير حتى تربط انتين اطول ومدى ابعد … تغطية الجهاز مقاربة لل(TP Link) يعني تحتاج تقوية حتى تبث لغير طابق او غرف جدا بعيدة (تكدر تاخذ اكستندر شاومي هم سعره رخيص ومتوافق وية الراوتر)
ملاحظة : جهازي (الفون) فئة متوسطة وشوية قديم واكيد بالاجهزة الاحدث والاعلى راح ينطي ارقام اعلى

اترك تعليقاً

لن يتم نشر عنوان بريدك الإلكتروني.