ثلاث امور لازم تتوفر بكل بيج فس بوك ب2020 واعتقد كثير مارح يكونون مستخدميها.

اولاً: داتابيس للكلمات البذيئة/المحظورة
ثانياً: بوت رد الي لتنظيم الزبائن او المتابعين ووضع داتا الFAQ بالبوت.
ثالثاً: أعدادات الوصول الصحيحة والامنة لمشروعك !
‌‌
رح اشرحلكم بشكل مختصر وحدة وحدة وابشركم بحلول جاهزة الها..

#الاولى: شايف من يكون عندك بيج ضخم مارح تكَدر تتابع التعليقات منو فشر منو غلط منو تجاوز منو سوة اعلان الخ.. فيسبوك منطيتك حل من 2016 كايلتلك عمي سوي ملف CSV اجمعلي بيه كل الكلمات والنصوص اللي تضوج منها ومتريدها وعوف الباقي عليه !!

هنا انت من رح ترفع الداتابيس مال فشار او كلمات بذيئة او حتى روابط فيسبوك رح يسوي بشكل تلقائي أخفاء للتعليقات اللي بيها احدى الكلمات المذكورة بالداتابيس مالتك وبهالحالة الفانز مالتك مارح يشوفون ابداً هذه الاعلان او الفشار وانما رح يبقى الكومنت Hidden ويظهر فقط لاصدقاء الشخص اللي علق لا اكثر.
‌‌
وازيدك من الشعر بيت دربالـــــــــــك بيوم من الايام تحذف كومنتات بالبوستات مالتك مابيها شي مخالف لفيسبوك وانما تسويلها اخفاء فقط اكو بلخيارات مال كومنت بدل delete اكو hide تدوس عليها ورح يختفي تعليق من فانز مالتك ويظهر بس لاصدقاء الشخص معلق وسايكلوجياً انت ربحت صاحب الكومنت لانك خليته يعبر عن اخلاقه الزبالة وبنفس الوقت ماخليت بقية الفانز مالتك يضوجون من وجوده. وبخلاف ذلك اذا انت جيت حذفت تعليقي واني عرفت وجيت سويتلك ريبورت الريتش مالتك رح ينزل لاسفل السافلين ك عقاب الك لكن فترة قصيرة ويرجع اقصاها 30 يوم لانك ببساطة استخدمت منصتك ضد حرية الرأي وفيسبوك متقبل هالشي فقط ان كان مخالف لمعاييرها.
‌‌
الاحلى من هذه كله الشباب والمبرمجين بكروب IQDevs ديشتغلون الكم على اكبر داتابيس عربية عراقية للكلمات البذيئة وبلنهاية رح يتوفرلكم قريباً ملف CSV مجرد ترفعه بالاعدادات مال بيج مالتك ورح تختفي كل تعليقات بذيئة والروابط الاحتيالية واذا تريد تنظم وتطوع للمشروع التطوعي وتبدي تضيف كلمات بذيئة هذه هو رابط البروجكت ( https://project-oslo.herokuapp.com/ ) وهذه سكرين بوست https://scr.3rb.ee/TDO.jpg

#الثانية: بكل بيج اذا تخلي بوت رد الي وتدرج بيه كل التفاصيل يحتاجها الزبون رح تكَدر بكل بساطة تختصر راتب موظف كامل للرد على رسائل الزبائن وممكن تحتاج موظف للحالات البسيطة فقط اللي يحتاج بيها الزبون كستم ريكوست خاص بيه لكن حتى لو عندك موظف رح تختصر الجهد عليه ب 80% على انه ينسخ ويرسل الردود الجاهزة.. وهمين بشكل مجاني الحل اليوم اجة من احد المطوريين بكروب ايكيوديفز ايضاً سوة ابلكيشن موبايل عبارة عن بوت الرد الالي لصفحات الفيسبوك ومستقبلاً ( انستا دايركت + واتساب ) تكدر من خلاله تربط البيج بالبوت وتبدي تسوي رسالة وصور وقوائم وتسجيلات صوتية جاهزة تدزها للعميل حسب كلمة يكتبها او حسب زر يدوس عليه وبهلحالة كل ردود رح تكون جاهزة.. مستقبلاً رح ننشر ايضاً templates جاهزة للردود الالية تكَدر من خلالها تضيفها ويسويلك مجموعة اسئلة واجوبة جاهزة تختصر عليك تعب كتابة كل تمبلت حسب براند ونوعه الخ.. ايضاً اكو شركات اكبر مثل Chatfuel و Silferbot الخ…

اكو ميزة مهمة للبراندات العراقية النحسة بما اني اعرف سالفتهم مال السعر مينذكر الا بالخاص.. من خلال البوتات تكَدر تسوي شغلة وهي اي واحد يعلق بالبوست مالتك ( السعر او شكد السعر ) البوت تلقائياً رح يرسله بالخاص السعر مال منتج وبهلحالة الزبون رح يحصل على سعر بسرعة وهم انت مخططك التسويقي الماسوني رح يتحقق بنجاح وتكسب تعليق الزبون ويرفع البوست ويوصل لاكبر عدد من اصدقائه الخ..

هذه ابلكيشن #بوتاتي الكَلنه عليه:

– اندرويد: https://play.google.com/store/apps/details?id=io.fomalhaut.sfar
– ايفون: https://apps.apple.com/app/id1525860436
‌‌
#ثالثاً: اعدادات الوصول الصحيحة, اني اعرف هواي براندات عراقية تعاني من مشكلة اثناء التمويل او اثناء النشر وهي الـ #Copyright خصوصاً جماعة المبلاس والمستحضرات التجميلية الخ.. اني اعرف مسبقاً ان منتجاتكم ممكن تكون كلك او دك النجف او صناعة تركية او صيني تقليد لبراندات عالمية لكن رح اجي بحسن النية واكول ان ماعدكم license مباشر يسمح للبيج مالتكم بالاعلان بصور المنتجات العالمية وهالشي يصير دائما مثلاً اني جنت ابيع كارتات نتفلكس ونتفلكس او اي شركة ثانية ماتسمح لاي بيج ثاني يحط الlogo او براند او منتجها بدون رخصة او بدون ضوابط التصميم المتبعه وبخلاف ذلك يغلق البيج او يحذف المنشور مع التنبيه او يمنع الترويج اله..
‌‌
لا تدوخنا اوك نبيع تقليد احنا هسه الحل شون ؟ الحل بكل بساطة انك تراقب اكبر حرامي بالعراق وتتعلم منه وهو شركة شبكتي للمحتوى المقرصن طبعاً لو تسال اي واحد بالخارج ليش متسوي لايك لصفحة شبكتي ؟ يكلك يا شبكتي ؟ اصلا ميعرفها والسبب ان صفحة شبكتي (البيج) مايظهر فقط بالعراق مسويين الreach مالته العراق فقط وبهالحالة محد رح يكدر يسوي ريبورت ولا تكدر شركات الحقوق انها تعرف البيج مالتك بخلاف الكروبات مثل متعرفون كروبات شبكتي كل فترة تنحذف لان مابيها هاي ميزة مال الوصول المحدد حسب البلدان والمدن.

وهسه انت من عرفت السالفة تجي شتسوي ؟ تخلي البيج ظاهر بس للعراق لان انت اصلا زبائنك همه محليين وبهلحالة رح تتجاوز هذه المشكلة مال تتبع الحقوق من قبل الAI مال فس بوك او شركات وسيطة..

زين اذا جنت اني صفحة اخبارية والولائين وجماعة احمد الغالب كاضيها ريبورتات للصفحة شسوي ؟ اوكف الحل موجود بنفس الطريقة لكن شتسوي ؟ تروح على الوصول وتسوي العكس ماتحظر كل البلدان وانما تحظر دولة انت مامستهدفها ابداً ولا بيها عراقيين متابعيك حسب الinsights بصفحتك تقرر تحظر يادولة مثلا اني بالبيج حاظر افعانستان وبهلحالة خلصان من سالفة يجي حمودي ئلهكر ئلهكر ويسوي ابلاغات عشوائية علبيج لان وصول الصفحة مخصص وليس عام.

زين اذا جنت اريد صفحتي تظل عام وماريد احد يبلغ على بوست معين ؟ ببساطة اكو ايضاً وصول بالبوستات كل العليك تسوي كالتالي

من ال publishing tools تسوي custom audience وتختار الوصول مال بوست +17 سنة وايضاً تحظر البوست من دولة غريبة مثل افغانستان وبهلحالة لما تنشر عن مقتدى ويجوك الصدريين يردون يحذفون بوست بالابلاغات فيسبوك مارح يقبل الحذف او اتخاذ اجراء بشكل الي عن طريق AI وانما رح يروح لموظف فيسبوك ويتم متابعته بشكل يدوي اذا جنت انت غلطان يحذف اذا جان سبام يتغلس عالموضوع ودائما يتغلس عالموضوع. وسالفة +17 لان اكو انواع من الابلاغات اللي تخلي فيسبوك يحذف بوست عسريع هي الChild abuse ئلهاقرز ئلعراقيين لما يردون يسون ابلاغات اول شي ياخذ مفعول هو الابلاغ عن ان هذه محتوى مؤذي للقاصرين والاطفال وانت لما تسوي بوست مالتك +17 او +18 مارح يتم اتخاذ اجراء بشكل الي وانما ايضاً يروح لموظف بشكل يدوي واذا شاف موظف مابيه شي بوست يغلس عليه كالعادة.. انت خوفك الاساسي من الAI اللي يكدرون يسون ابلاغات عشوائية من خلاله تؤدي لاخفاء صفحة باسوء الاحوال لحين فتح Appeal

بهذه الثلث نقاط انت رح تكون محمي تماماً من المتطفلين وبنفس الوقت البيج مالتك على اعلى درجة من الامان والسرعة بالرد وتذكر دائما نقاط فوك كلها الها دخل بالreach يعني لما تسويها هي مكسب للفانز مالتك وليس الك فقط.

ودمتم سالمين.

اترك تعليقاً

لن يتم نشر عنوان بريدك الإلكتروني.