ليش اكو مشاكل على الجيل الخامس او ما يعرف بال 5G ؟

بالرغم احنة معلينة بهاي السوالف الي مراح نشوفها بس خلي نتعرف اليوم على شي اسمه انترنت الاشياء والي هو اهم تطبيقات الجيل الخامس والي منه بدت كل المشاكل. كل الانترنت الي استخدمناه مسبقا كان ببساطة (بالرغم من انه اعجوبة وقته بس حاليا نكول ببساطة فركز على هاي الفكرة ) نقل معلومة وتناقل ملفات وتواصل وتحاور فقط.

بالجيل الخامس حصلنا على باند اعلى يعني سرع اكثر و تردد افضل يعني ping افضل واجهزة اسرع يعني معدل استجابة عالي كلش وهذا الي خلا انترنت الاشياء وتطبيقاته يتربع على عرش السيطرة
وحتى نعرف شنو انترنت الاشياء بصورة مبسطة خلي نسولف على اهم تطبيقاته

ما هو انترنت الاشياء:

– تخاطب الاجهزة بينها وسيطرة الانظمة الالكترونية فيعني مثلا ان السيارات كلهة راح تكون مزودة بهاي التقنيات وبالتالي تتخاطب فيما بينها وتحلل اتجاهات و زخم وهذا يعني انعدام الحوادث او تقليلها لنسب ميتة كلش واكيد التخاطب هذا راح يوفر للسيارة قراءة خوارزمية والي معناها وصول اسرع وطريق اكثر سلسل

– تناقل العقول وما بالمعنى الي فهمته وانما كمثال ان الطبيب الموجود في لندن وعنده عملية في موسكو ما حاجة يسافر والمريض بالتالي ينتظر وقت ممكن يموت بيه لوصول الطبيب وانما استخدام اجهزة تحكم عن بعد تساعد الطبيب باستقرارية اكثر وسرعةاستجابة عالية ان يسوي العملية عن بعد بدون اخطاء واكيد بالمستقبل راح يتوفر موضوع التحكم بالاجهزة عن طريق التفكير

– تلبية الاحتياجات بدون طلب وكمثال الحاجات اليومية من اكل و شرب و تنقل وغيرها فالثلاجة مثلا راح تحسب اكلك اليومي وشكد بيها مخزون و شكد معدل مدخولك الشهري وبالتالي تتواصل وية السوبر ماركت الي يتسوكلك وبدون اي تدخل منك اضافة الى ترتيب اولويات الحياة وحلها باسرع وقت وبدون ما تدري

زين هسة عرفنا شنو ممكن يكون بانترنت الاشياء واكو تطبيقات اكثر بهواية بس ليش اكو مشاكل:

– المراقبين متخوفين من سيطرة مجموعة من الناس على عادات مجتمع كامل او حتى دولة كاملة فانت بعد ما تعتمد بصورة كاملة راح يكون من السهل تحديد اساليب حياتك واكلك وشربك ويا شركة بالضبط مستقبلا واكيد مثل مدا يصير هسة.

– تخوفات سياسية : سيطرة الصين وهواوي بالذات على ثلث التقنية وتنفيذها سبب تخوفات من وصول هذا الكم من المعلومات الى الصين وبالتالي معرفة مقومات اي بلد وامكانية ايقافه او ابتزازه مستقبلا والسيطرة عليه وهذا اكيد مو لسواد عين البقية وانما الكل يريد يملك السلطة والقوة.

– اصحاب نظرية المؤامرة والتخوف من سيطرة الالات بيوم ما على البشر واكيد شفنا كلنا هلشي بهواية من الافلام بس انترنت الاشياء راح يسهل وصولنا بشكل اسرع الى نتيجة السيطرة.

-تخوفات اقتصادية : اكيد من المعلوم والمفهوم ان السيطرة على عادات الحياة راح تحدد الخيارات وهذا بالتالي توجيه المجتمعات الى براندات معينة او عادات معينة ومبيعات لشركات معينة.

– تخوفات مجتمعية : الانسان يحتاج عنصر الحاجة بحياته حتى تشتغل عنده الغريزة وبالتالي الاختراع , وانترنت الاشياء مراح يخليك محتاج شي وبالتالي راح تعيش بدون حاجة وبالتالي ماكو شي جديد راح يتطور او ينصنع او ينحل وهذا يفسر نفسه بنفسه
بالاخير اسف اذا كان الموضوع طويل بس حاولت اختصر بعد ما انمسح المنشور الاول من ورة مارك والفيسبوك ويب الجديد بس ان شاء الله كنت موفق بالشرح وايصال المعلومة واكيد من الممكن اكو مستقبلا شروحات اكثر

اترك تعليقاً

لن يتم نشر عنوان بريدك الإلكتروني.